Lagtaa nahiiN hai dil meraa

Lagtaa nahiiN hai dil meraa ujDe dayaar meN
kiski banii hai aalam-e-naa paaidaar meN

kah do in hasratoN se kahiiN aur jaa baseN
itnii jagah kahaaN hai dil-e-daaGdaar meN

umr-e-daraaz maang ke laaye the chaar din
do aarzuu meN kaT gaye, do intezaar meN

kitnaa hai badnasiib zafar dafan ke liye
do gaz zamiin bhii na milii kuu-e-yaar meN

Bahadur Shah Zafar

Nazar nahin aataa......

main apane Khvaab se bichhaDaa nazar nahiin aataa
tuu is sadii mein akelaa nazar nahiin aataa

ajab dabaav hai in bahrii havaaon kaa
gharon kaa bojh bhii uThataa nazar nahiin aataa

main ek sadaa pe hameshaa ko ghar chhoD aayaa thaa
magar pukaarane vaalaa nazar nahiin aataa

main terii raah se haTane ko haT gayaa lekin
mujh to ko_ii bhii rastaa nazar nahiin aataa

dhuaaN bharaa hai yahaaN sabhii kii aaNkhon mein
kisii ko ghar meraa jalataa nazar nahiin aataa............

Hai Ikhtiyaar mein tere to .....

hai ikhtiyaar mein tere to mojazaa kar de
vo shaKhs meraa nahiin hai use meraa kar de

ye ret_zaar kahiin Khatm hii nahiin hotaa
zaraa sii duur to rastaa haraa bharaa kar de

main us ke jaur ko dekhuuN vo meraa sabr-o-sukuuN
mujhe charaaG banaa de use havaa kar de

akelii shaam bahut jii udaas karatii hai
kisii ko bhej koii meraa hamnavaa kar de....

Dil ki Tanhayiyon se

Dil ki tanhayiyon se zindagi ke raaste nahin kat te,

tumhare bina hamari tanha raatein nahin kat te.

Tumne to apne dil ko rakh diya hai us shaher mein,

Jiske raaste hamari manzil tak nahin pahonjhte.

Apne dil ke raaston ko aise band mat karo,

kyunki usi ki raah se hamari bhi saansein hai guzarte.

Itna rooth kar kaha jaaoge humse,

Aap ke raaste to hamari hi manzil par aaker rukte.

Mumkin ho aap se to.....

mumkin ho aap se to bhulaa diijiye mujhe
patthar pe hun lakiir miTaa diijiye mujhe


har roz mujh se taazaah shikaayat hai aap ko
main kyaa hun ek baar bataa diijiye mujhe


mere sivaa bhii hai koii mauzuu-e guftuguu
apanaa bhii koii rang dikhaa diijiye mujhe


main kyaa hun kis jagah hun mujhe kuchh Khabar nahiin
hain aap kitanii duur sadaa diijiye mujhe


kii main ne apane zaKhm kii tashahiir jaa-ba-jaa
main maanataa hun jurm sazaa diijiye mujhe


qaayam to ho sake koii rishtaa gauhar ke saath
gehare samundaron mein bahaa diijiye mujhe


shab bhar kiran kiran ko tarasane se faayadaa
hai tiiragii to aag lagaa diijiye mujhe


jalate dinon mein Khud pas-e-diivaar baiThakar
saaye kii justujuu mein lagaa diijiye mujhe


"Shehzad" yuuN to sholaa-e jaan sard ho chukaa
lekin sulag uthun to havaa diijiye mujhe

Himmat-e-iltijaa nahiin baaqii

himmat-e-iltijaa nahii.n baaqii
zabt kaa hausalaa nahii.n baaqii
 
ik terii diid chhin ga_ii mujh se
varnaa duniyaa me.n kyaa nahii.n baaqii
  
apanii mashq-e-sitam se haath na khe.nch
mai.n nahii.n yaa vafaa nahii.n baaqii
  
terii chashm-e-alam_navaaz kii Khair
dil me.n ko_ii gilaa nahii.n baaqii
  
ho chukaa Khatm ahad-e-hijr-o-visaal
zindagii me.n mazaa nahii.n baaqii

aaiiye haath uthaayein ham bhii

aaiiye haath uThaaye.n ham bhii
ham jinhe.n rasm-e-dua yaad nahii.n
ham ji.nhe.n soz-e-mohabbat ke siwaa
koii but, koii Khudaa yaad nahii.n

aaiiye arz guzare.n ki nigaar-e-hastii
zahar-e-imaroz me.n shiiriinii-e-fardaa.N bhar de
wo ji.nhe.n tabe garaa.Nbaarii-e-ayyaam nahii.n
unakii palako.n pe shab-o-roz ko halkaa kar de

jinakii aa.Nkho.n ko ruKh-e-subh kaa yaaraa bhii nahii.n
unakii raato.n me.n koii shamaa munawwar kar de
jinake qadamo.n ko kisii rah kaa sahaaraa bhii nahii.n
unakii nazaro.n pe koii raah ujaagar kar de

jinakaa dii.n pairavii-e-kazbo-riyaa hai unako
himmat-e-kufr mile, jurat-e-tahaqiiq mile
jinake sar mu.ntazir-e-teG-e-jafaa hai.n unako
dast-e-qatil ko jhaTak dene kii taufiiq mile 

 
ishq kaa sarr-e-nihaa.N jaan-tapaa.N hai jis se
aaj iqaraar kare.n aur tapish miT jaaye
harf-e-haq dil me.n KhaTakataa hai jo ka.NTe kii tarah
aaj izahaar kare.n or Khalish miT jaaye 

Tera Shauq -E- Mohabbat

mujh ko jis dil kii shikaayat, ki qaaboo men nahiin
ab tarhapta hoon akelaa, vo bhii pehloo men nahiin

tum mere saath ho, ye sach to nahiin, lekin
main agar jhooth na boloon to akela ho jaaoon

akele chalnaa to meraa nasiib thaa ki mujhe
kisii ke saath safar baantna nahiin aataa

tujh ko tanha kar gayaa munfarid rehne kaa shauq
ab akele baith kar yaadon ke manzar dekhnaa

jo bulhavis the, voh gumraah ho gaye aakhir
akelaa rah gayaa, main manzil-e-muhabbat men.......

Jab Dor Ufq Pe LAli ho....

Jab Dor Ufq Pe LAli ho....
Jab Sham Udasi Wali ho...
Jab Zabt ka Bandhan Tota ho..
Jab aas ka Daman Chhuta ho...
Jab Darshan piyas Bujhatay hon..
Jab Musam Geet Sunatay hon...
Jab kaan Hon Tarsy Baton ko...
Jab Neend Na Aey Rato ko...
Jab Ankhon mein Jagratay hon...
Jab apnay Dard Staty Hon

Tab Yaad Bahot Tum Atay Ho..
Tab Yaad Bahot Tum Atay Ho..

Suno

Mujhe Rona nhi Ata
Mujhe khona nhi Ata
K tum bin Jeena mushkil hai...

Jo Dard Tum Dena chahtay ho mujhe Sehna nhi Ata

Tum to Reh LO gay Sath kisi Aur k magar..
Main kya kro mujhe Rasta Badalna nhi Ata...

Tum to Waaqif ho Andaz e Guftgu se
Mujhe to bat karne ka salika b nhi Ata...

Tum to Jeet jatay ho Lar jhagar kr bhi..
Dekho mujhe to Larna b nhi Ata..

Tum To Khush Reh Lo gay mere Bin..
Dekho Tumare Bin To mujhe Jeena B nhi Ata.