yaaden chaliin Khayaal chalaa ashk-e-tar chale
lekar payaam-e-shauq ka_ii naamabar chale
dil ko sanbhaalate rahe har haadase pe ham
ab kyaa karen ki Khud tere gesuu bikhar chale
har gaam pe shikast ne yuuN hausalaa diyaa
jis tarah saath saath koii ham_safar chale
shauq-e-talab na ho ko_ii baang-e-jaras to ho
aaKhir ko_ii chale to kis ummiid par chale
ab kyaa karoge sair-e-chaman_zaar-e-aarazuu
rut jaa chukii chaDhe hue dariyaa utar chale
raahon men 'Hosh' sang barasate hain har taraf
lekar ye kaaravaan-e-tamannaa kidhar chale.....
0 comments:
Post a Comment