khwaab tooten hain to

khwaab tooten hain to ab khwaab ka charcha na karo

dil ke tukRo ko sar-e-aam yun rusva na karo

dard hi dard ye mehboob diya karten hain

in se ailan e mohabbat ki tamanna na karo

zulmat-e-shab me sehar me na rahe farq koee

apni aankhon me ab itna bhi andhera na karo

aah vo shok jawaani pe vo chanchal si hansee

ghum hi ho jaaye na khamoshi me eysa na karo

yaad guzre huve lamho ki bohot aayegi

tum bhi sookhe huve zakhmon ko kureda na karo

uski har baat ho jeyse ke fasaana koee

tum jo maano to bahaano pe bharosaa na karo

ungliyaan tum pe uthengi to tumhaari apni

dil-e-bezaar ka baazaar me charcha na karo

dekho maasoom nigaahon me sawaal uthte hain

inse tum kuch bhi chupaane ka iraadaa na karo

abke tajdeed-e-wafa ka nahi imkaa`N "Safiya"

khwaab dekha na karo khwaab dikhaya na karo