apni palkoN pe mohabbat ko saNbhaale rakhna
raat taareek sahi dil meiN ujaale rakhna
aah karne meiN tau hoti hai yahaaN ruswaaii
dil meiN tofaaN hi sahi hoNToN pe taale rakhna
bhool jaaye na zamaana mera ahwaal kaheeN
daastaanoN meiN mere gham ke hawaale rakhna
apni faryaad ko seene meiN chupaa le ai dil
shewaa-e-ishq nahiN hoNtoN pe naale rakhna
zalzale rooh ke ab jism tak aa pohNche heiN
apne pehloo meiN zaraa dil ko saNbhaale rakhna
aable phooT ke ab mujh ko sukooN dete heiN
raas aayaa hai mujhe paaooN meiN chaale rakhna
meiN bhi Suqraat ka saani hooN zamaane meiN Shoaib
mere peene ke liye zehar ke piyaale rakhna
0 comments:
Post a Comment