Apna to raviyyaa

apna to raviyyaa hai yeh guftaar sey pehlay

saabit karo talqeen ko kirdaar sey pehlay

poocho to zara haal bhi beemaar sey pehlay

dil ko na qaraar aaigaa deedaar sey pehlay

insaan ki tehzeeb ki taareekh gavaah hai

fojain bhi kabhi haari hain salaar sey pehlay

kiaa yaad ho iss umr main tarteeb dinon ki

Mangal bhi to aajata hai Itwaar sey pehlay

azbar thay usay pagrhi kay aadaab hain jitnay

sar dainay peh raazi tha joh dastaar sey pehlay

tai ki mairay qadmon nay tasuvver ki musaafat

manzil peh hoon ponhcha huva raftaar sey pehlay

khush ho to faqeeron ka tamaskhur na urhaao

tum bhi to nazar aatai thay baizaar sey pehlay

daanaaii hai is qawl main hikmat bhi bohat hai

tolo to zara baat ko guftaar sey pehlay

tameer main tarteeb bhi aajaa'y to achaa

kia dar bhi bana karta hai deewaar sey pehlay

waaiz yeh kahay jurm hai nazron ki khayaanat

poocho to kabhi guzra hai baazaar sey pehlay

mayoos na ho waqt guzar jaaiga yeh bhi

achchay bhi to din aa'y thay aazaar sey pehlay

aisa to na tha dil kabhi mahroom-e-mohabbat

apni bhi mulaqaat thi doa-chaar sey pehlay

kut jaaingain yeh haat joh banjaaiga madfun

yeh baat to tai karni thi mamaar sey pehlay

qazi tairay insaaf sey yeh mujh ko gilaa hai

pakrhay hai yeh masoom gunahgaar sey pehlay

Fazil to naheen likkhaiga shaahon ki hikaayat

turbut isay manzoor hai darbaar sey pehlay