Yaqiinan use dhokaa hogaa

Apane Khvaabon me tujhe jis ne bhii dekhaa hogaa
Aankh khulate hii tujhe Dhundhane nikalaa hogaa

Zindagii sirf tere naam se mansuub rahe
Jaane kitane hii dimagon ne ye sochaa hogaa

Dost ham us ko hii paiGaam-e-karam samajhenge
Terii furqat kaa jo jalataa huaa lamhaa hogaa

Daaman-e-ziist me ab kuchh bhii nahi hai baaqii
Maut aa jay to yaqiinan use dhokaa hogaa

Raushanii jis se utar aai lahuu me mere
Ay masiihaa vo meraa zaKhm-e-tamannaa hogaa..........

Baarish huii to........

baarish hu_ii to phuulon ke tan chaak ho gaye
mausam ke haath bhiig ke saffaak ho gaye

baadal ko kyaa Khabar ki baarish kii chaah men
kitane buland-o-baalaa shajar Khaak ho gaye

juganuu ko din ke vaqt pakadane kii zid karen
bachche hamaare ahad ke chaalaak ho gaye

laharaa rahii hai barf kii chaadar haTaa ke ghaas
suuraj kii shah pe tinake bhii bebaak ho gaye

suuraj dimaaG log bhii iblaaG-e-fikr men
zulf-e-shab-e-firaaq ke pechaak ho gaye

jab bhii Gariib-e-shahar se kuchh guftaguu hu_ii
lahaje havaa-e-shaam ke nam_naak ho gaye

saahil pe jitane aab_guziidaa the sab ke sab
dariyaa ke ruKh badalate hii tairaak ho gaye

Guman

main kachchii niind men huuN 
aur apane niim_Khvaabidaa tanaffus men utaratii 
chaaNdanii kii chaap sunatii huuN 
gumaaN hai 
aaj bhii shaayad 
mere maathe pe tere lab 
sitaare sabaat karate hain 

Jaisay ho phir bhi achay ho

Itni muddat baad milay ho!
Kin sochon mien gum phirtay ho?
Itnay khaif kion rahtay ho?
Her aahat say darr jatay ho
Taiz hawaa nay mujh say poocha
Rait per kia likhtay rahtay ho?
Kaash koi hum say bhi poochay 
Raat gaye tak kion jagay ho?
Mien darya say bhi darta hon
Tum darya say bhi gahray ho
Kaun si baat hai tum mien aisi 
Itnay achay kion lagtay ho?
Peechay murr kar kion dekha tha
Patthar ban kar kia taktay ho
Jao jeet ka jashan manao 
Mien jhoota hon tum sachay ho
Apnay shahar kay saray logon say 
Meri khatir kion uljhay ho
Kahnay ko rahtay ho dil mien
Phir bhi kitnay duur kharay ho
Raat humien kuch yaad nahi tha
Raat buhut hee yaad aye ho
Hum say na poocho hijar kay qissay 
Apni kaho abb tum kaisay ho
Faraz tum badnaam buhut ho
Jaisay ho phir bhi achay ho..........

Tu ho ger saath to.............

sada-e-dil tu hi , awanz-e-janu hamaari hey

ke tujh mein khoi huwi apni dunya saari hey

tera hi rang-e-takhayul jazbaat pe chhaya hey

sareer araai teri her gosha-e-jaan taari hey

bahar-e-baad ghata zulf o kashaish-e-husn

aahoo-e-zarrien mein yakta-e-waza dari hey

suroop rangini-e-zebaish, o rang-e-apsara

sarapa-e-dilkushan qudrat ki sana kari hey

sokhta dil ho key jan gosha-e-tanhai guman

bas teri aik jhalak barson ki ghum gusari hey

hum sukhan, hum nafas, hum rung-e-dil o jan

warafta dil ko teri humsafari eztiraari hey

khayal tera nakhl-e-sehra o dar qatar key tu

kadi dhoop mein ba saya dar shajar kari hey

mata-e-zest hey tu, teri hamnawai ko salam

tu ho ger saath to zindagi hamein piyari hey

kushan kusha dil us ka huwa jata hey sabat

ye kasi uss ki mohabbat mey sitam kaari hey

Khush haal se tum bhi lagte ho

Khush haal se tum bhi lagte ho
Youn afsurda to hum bhi nahi
Per jan'nay wale jante hain
Khush tum bhi nahi, khush hum bhi nahi
Tum apni khudi k pehray mai
Aur daam-e-ghuroor mai jakray huwe
Hum apne zuam k nirghay mai
Ana hath humaray pakray huwe
Ek muddat se ghaltan-o-paichan
Tum rabt-o-guraiz k dhagon mai
Hum apne aap se ulajhe huwe
Pachtawon k angaroon mai
Mahsoor-e-talatum aaj bhi ho
Go tum ne kinaray dhoondh liye
Toofan se sambhlay hum bhi hain
Kehnay ko saharay doondh liye
Khamosh se tum, hum mohar ba lab
Jag beet gaye tuk baat kiye
Suno khail adhoora chorte hain
Bina chaal chale bina maat kiye
Jo bhagte bhgate thak jaein
Wo saye ruk bhi sakte hain
Chalo toro qasam iqrar kerein
Hum donon jhuk bhi saktay hain.........

Log jab khuda ho jayen

is se pehle ke bewafa ho jayen
kyun na aey dost hum juda ho jayen

tu bhi heere se ban gaya patthar
hum bhi jane kal kia se kia ho jayen

tu ke yakta tha be shumar huwa
hum bhi totain to ja baja ho jayen

hum bhi majborion ka uzr karain
phir kahain aur mubtila ho jayen

hum agar manzalain na bun payeen
manzalon tak ka raasta ho jayen

dair se soch main hain parwane
raakh ho jayen, ya hawa ho jayen

ishq bhi khail hai naseebon ka
khak ho jayen, kemia ho jayen

ab ke gar to mile to hum tujh se
aise liptain teri qaba ho jayen

bandagi hum ne chor di faraz
kia karain log jab khuda ho jayen..........

sadaa kahate kahate

main ehavaal-e-dil mar gayaa kahate kahate
thake tum na "bas, bas, sunaa!" kahate kahate

mujhe chup lagii mudd'aa kahate kahate
ruke hai.n vo jaane kyaa kahate kahate

zabaaN guung hai ishq mein gosh kar hai
buraa sunate sunate bhalaa kahate kahate

shab-e-hijr mein kyaa hajuum-e-balaa hai
zabaaN thak ga_ii marhabaa kahate kahate

gilaa harzaa-gardii kaa bejaa na thaa kuchh
vo kyuuN muskuraaye bajaa kahate kahate

sad afasos jaatii rahii vasl kii shab
"zaraa Thahar ai bevafaa" kahate kahate

chale tum kahaa.N main ne to dam liyaa thaa
fasaanaa dil-e-zaar kaa kahate kahate

sitam haaye! garduuN mufassil na puuchho
ke sar phir gayaa maajaraa kahate kahate

nahiin yaa sanam 'Momin' ab kufr se kuchh
ke Khuu ho ga_ii hai sadaa kahate kahate ............

paa-ba-gil sab hain

paa-ba-gil sab hain rihaa_ii kii kare tadabiir kaun
dast-bastaa shahar mein khole merii zanjiir kaun

meraa sar haazir hai lekin meraa munsif dekh le
kar rahaa hai mere fard-e-jurm kii tahariir kaun

aaj darvaazon pe dastak jaanii pahachaanii sii hai
aaj mere naam laataa hai merii taaziir kaun

niind jab Khvaabon se pyaarii ho to aise ahad mein
Khvaab dekhe kaun aur Khvaabon ko de taabiir kaun

ret abhii pichhale makaano.n kii na vaapas aa_ii thii
phir lab-e-saahil gharaundaa kar gayaa taamiir kaun

saare rishte hijraton mein saath dete hain to phir
shahar se jaate hue hotaa hai daaman_giir kaun

merii chaadar to chhinii thii shaam kii tanhaa_ii ne
beridaa_ii ko merii phir de gayaa tashahiir kaun

dushmanon ke saath mere dost bhii aazaad hain
dekhanaa hai khenchataa hai mujh pe pahalaa tiir kaun

kaaravaan-e-dard kii manzil Thahar jaaye

kahiin to kaaravaan-e-dard kii manzil Thahar jaaye
kinaare aa lage umr-e-ravaaN yaa dil Thahar jaaye

amaaN kaisii ki mauj-e-KhuuN abhii sar se nahiin guzarii
guzar jaaye to shaayad baazuu-e-qaatil Thahar jaaye

ko_ii dam baadabaan-e-kashtii-e-sahabaa ko tah rakho
zaraa Thaharo Gubaar-e-Khaatir-e-mahafil Thahar jaaye

hamaarii Khamoshii bas dil se lab tak ek vaqfaa hai
ye tuufaaN hai jo pal bhar bas lab-e-saahil Thahar jaaye

nigaah-e-muntazir kab tak karegii aaii_naabandii
kahiin to dasht-e-Gam mein yaar kaa mahamil Thahar jaaye...

ke tum ho

jis simt bhii dekhuuN nazar aataa hai ke tum ho
ai jaan-e-jahaa.N ye ko_ii tum saa hai ke tum ho

ye Khvaab hai Khushbuu hai ke jhonkaa hai ke pal hai
ye dhundh hai baadal hai ke saayaa hai ke tum ho

is diid kii sa_aat mein kaii rang hain larazaaN
main huu.N ke koii aur hai duniyaa hai ke tum ho

dekho ye kisii aur kii aankhen hain ke merii
dekhuuN ye kisii aur kaa cheharaa hai ke tum ho

ye umr-e-gurezaaN kahiin Thahare to ye jaanuuN
har saans mein mujh ko ye lagataa hai ke tum ho

har bazm mein mauzuu-e-suKhan dil zad_gaaN kaa
ab kaun hai shiiriin hai ke lailaa hai ke tum ho

ik dard kaa phailaa huaa saharaa hai ke main huuN
ik mauj mein aayaa huaa dariya hai ke tum ho

vo vaqt na aaye ke dil-e-zaar bhii soche
is shahar mein tanhaa koii ham saa hai ke tum ho

aabaad ham aashuftaa saron se nahiin maqtal
ye rasm abhii shahar mein zindaa hai ke tum ho

ai jaan-e-'Faraz' itanii bhii taufiiq kise thii
ham ko Gam-e-hastii bhii gavaaraa hai ke tum ho........

Lagtaa nahiiN hai dil meraa

Lagtaa nahiiN hai dil meraa ujDe dayaar meN
kiski banii hai aalam-e-naa paaidaar meN

kah do in hasratoN se kahiiN aur jaa baseN
itnii jagah kahaaN hai dil-e-daaGdaar meN

umr-e-daraaz maang ke laaye the chaar din
do aarzuu meN kaT gaye, do intezaar meN

kitnaa hai badnasiib zafar dafan ke liye
do gaz zamiin bhii na milii kuu-e-yaar meN

Bahadur Shah Zafar