Thursday, April 28, 2011

kabi waqat mily to aajao..



kabi waqat mily to aajao..
hum jheel kinary bethe hain..
tum apne sukh ki baat karo....
hum apne dukh ki baat karen...
aur un lamhon ki baat karen...
jo sung tumhary beet gaye..
aur Ehd-e-Khizan ki nazar huye...
in sabz rutoon k daman mein...
hum pyaar ki khushbu mehkaen...
In bikhary sabz nazaro ko.
hum aankhon mein tasweer karen..
phir apney pyaar k jadu se..
hum lamhon ko jageer karen..
kabhi waqt mily to aajao..
hum jheel kinary bethe hain......


Tuesday, April 26, 2011

Dastak na sunaaii degii



Raat aaii hai balaaon se rihaaii degii
Ab na diivaar na zanjiir dikhaaii degii

Vaqt guzaraa hai pa mausam nahiin badalaa yaaro
Aisii gardish hai zamiin khud bhii duhaaii degii

Ye dhundalakaa saa jo hai us ko ganiimat jaano
Dekhanaa phir koii suurat na sujhaaii degii

Dil jo tuutegaa to ik turfaa tamaashaa hogaa
Kitane aaiinon men ye shaql dikhaaii degii

Saath ke ghar men badaa shor barpaa hai 'Anwar'
Koii aayegaa to dastak na sunaa_ii degii...........


Gamon se raabataa rahane diyaa


raaz kii baaten likhii aur Khat khulaa rahane diyaa
jaane kyon rusavaaion kaa silasilaa rahane diyaa


umr bhar mere saath rahakar vo na samajhaa dil kii baat
do dilon ke daramiyaaN ik faasalaa rahane diyaa

apanii fitarat vo badal paayaa na isake baavajuud
Khatm kii ranjish magar gilaa rahane diyaa

main samajhataa thaa Khushii degii mujhe "Sabir" fareb
is liye main ne Gamon se raabataa rahane diyaa......


Monday, April 25, 2011

Main aur Merii aavaaragii


phirate hain kab se dar_ba_dar ab is nagar ab us nagar
ek duusare ke ham_safar main aur merii aavaaragii
naa aashanaa har rah_guzar naa mehar_baaN hai ek nazar
jaayen to ab jaayen kidhar main aur merii aavaaragii

ham bhii kabhii aabaad the aise kahaaN bar_baad the
bifikr the aazaad the masaruur the dil_shaad the
vo chaal aisi chal gayaa ham bujh gaye dil jal gayaa
nikale jalaa ke apanaa ghar main aur merii aavaaragii

vo maah-e-vash vo maah-e-ruuh vo maah-e-kaamil huu_ba_huu
thiin jis kii baaten kuu_ba_kuu us se ajab thii guftaguu
phir yuuN huaa vo kho ga_ii aur mujh ko zid sii ho ga_ii
laayenge us ko DhuuND kar main aur merii aavaaragii

ye dil hii thaa jo sah gayaa vo baat aisii kah gayaa
kahane ko phir kyaa rah gayaa ashkon kaa dariyaa bah gayaa
jab kah kar vo dil_bar gayaa tere liye main mar gayaa
rote hain us ko raat bhar main aur merii aavaaragii

ab Gam uthaayen kis liye ye dil jalaayen kis liye
aaNsuu bahaayen kis liye yuuN jaaN gavaayen kis liye
peshaa na ho jis kaa sitam Dhundenge ab aisaa sanam
honge kahiin to kaar_gar main aur merii aavaaragii

aasaar hain sab khoT ke imkaan hain sab choT ke
ghar band hain sab koT ke ab Khatm hai sab ToTake. 
qismat kaa sab ye khel hai andher hii andher hai
aise hue hain be_asar main aur merii aavaaragii

jab ham_dam-o-ham_raaz thaa tab aur hii andaaz thaa
ab soz hai tab saaz thaa ab sharm hai tab naaz thaa
ab mujh se ho to ho bhii kyaa hai saath vo to vo bhii kyaa
ek behunar ek besabar main aur merii aavaaragii........

Friday, April 22, 2011

Khuda gavah ki un ke firaq men


kabhii jo nikhat-e-zulf-e-nigaar aaii hai
fazaa-e-murdaa-e-dil men bahaar aaii hai

zaruur terii galii se guzar huaa hogaa
ki aaj baad-e-sabaa beqaraar aaii hai

koii dimaag tasavvur bhii jin kaa kar na sake
ye jaan-e-zaar vo lamahen guzaar aaii hai

Khudaa gavaah ki un ke firaaq men "Kausar"
jo saanse aaii hai vo sogavaar aaii hai.........


Wednesday, April 20, 2011

kabhii Aah lab pe machal gaii


kabhi aah lab pe machal ga_ii kabhi ashk aankh se dhal gaye
vo tumhaare gam ke chiraag hain kabhii bujh gaye kabhi jal gaye

main khayaal-o-khvaab ki mahafilen na baqadr-e-shauq sajaa saka
tumhaari ik nazar ke saath hii mere sab iraade badal gaye

kabhi rang men kabhi ruup men kabhi chaanv men kabhi dhup men
kahin afataab-e-nazar hain vo kahin maahatab men dhal gaye

jo fanaa huye gam-e-ishq men unhen zindagii kaa na gam huaa
jo na apanii aag men jal sake vo paraa_ii aag men jal gaye

ya unhen bhi meri tarah junun to phir un men mujh men ye farq kya
main giraft-e-gam se na bach saka vo huduud-e-gam se nikal gaye .

Saturday, April 16, 2011

Kabhi nekii bhi ......

Kabhii nekii bhii usake jii men aa jaaye hai mujhase
Jafaayen karake apanii yaad sharmaa jaaye hai mujhase

Khudaayaa! Jazbaa-e-dil kii magar taasiir ulatii hai

Ki jitanaa khenchataa huun aur khinchataa jaaye hai mujhase

Vo bad khuu aur merii daastan-e-ishq tuulaaniii

Ibaarat mukhtasar, qaasid bhii ghabaraa jaaye hai mujhase

Udhar vo badagumaanii hai, idhar ye naatavanii hai

Naa puuchhaa jaaye hai usase, na bolaa jaaye hai mujhase

Sanbhalane de mujhe ae naaumiidii, kyaa qayaamat hai

Ki daamaane khayaale yaar chhuutaa jaaye hai mujhase

Takalluf bar taraf nazzaaragii men bhii sahii, lekin

Vo dekhaa jaaye, kab ye zulm dekhaa jaaye hai mujhase

Hue hain paanv hii pahale nabard-e-ishq men zakhmii

Na bhaagaa jaaye hai mujhase, na thaharaa jaaye hai mujhase

Qayaamat hai ki hove muddaii kaa hamsafar ‘ghalib’

Vo kaafir, jo khudaa ko bhii na saunpaa jaaye hai mujhase ..

kabhi saya hai kabhi dhup


kabhii saayaa hai kabhii dhuup muqaddar meraa
hotaa rahataa hai yuun hii qarz baraabar meraa

tuut jaate hain kabhii mere kinaare mujh men

duub jaataa hai kabhii mujh men samandar meraa

kisii saharaa men bichhad jaayenge sab yaar mere

kisii jangal men bhatak jaayegaa lashkar meraa

baavafaa thaa to mujhe puuchhane vaale bhii na the

bevafaa huun to huaa naam bhii ghar ghar meraa

kitane hansate hue mausam abhii aate lekin

ek hii dhuup ne kumhalaa diyaa manzar meraa

aakhirii jur'a-e-pur_kaif ho shaayad baaqii

ab jo chhalakaa to chhalak jaayegaa saagar meraa...

Monday, April 11, 2011

Yaaden Chaliin Khayaal Chalaa


yaaden chaliin Khayaal chalaa ashk-e-tar chale
lekar payaam-e-shauq ka_ii naamabar chale

dil ko sanbhaalate rahe har haadase pe ham
ab kyaa karen ki Khud tere gesuu bikhar chale

har gaam pe shikast ne yuuN hausalaa diyaa
jis tarah saath saath koii ham_safar chale

shauq-e-talab na ho ko_ii baang-e-jaras to ho
aaKhir ko_ii chale to kis ummiid par chale

ab kyaa karoge sair-e-chaman_zaar-e-aarazuu
rut jaa chukii chaDhe hue dariyaa utar chale

raahon men 'Hosh' sang barasate hain har taraf
lekar ye kaaravaan-e-tamannaa kidhar chale.....


Wednesday, April 6, 2011

Thaharataa gayaa main....


yaad kyaa dast-e-hunar hai ki sanvarataa gayaa main
us ko sochaa to use yaad hii karataa gayaa main

is ko tahaziib-e-junuun kahiye ki mujh se pahale
jaise bikhare hain sabhii log bikharataa gayaa main

naqsh kitane the ki maaduum hue sil_silaavaar
aur har naqsh ke pahaluu se ubharataa gayaa main

ek tasviir banaa_ii thii mukammal na hu_ii
ek hii rang lahuu rang thaa bharataa gayaa main

harf-e-ikraar hii kahataa rahaa bekhaufii se
yaanii inkaar ke aashob se darataa gayaa main

apane andar ke talaatum ne rakkhaa hai aabaad
khud hii ikraar kiyaa khud hii mukarataa gayaa main

har nafas badhataa gayaa us kii tamannaa kaa kharosh
lamhaa lamhaa isii vahashat men nikharataa gayaa main

zindagii kuu-e-malaamat hai ko_ii kyaa thahare
apanii hii vazaa kaa main huun so thaharataa gayaa main....

Saturday, April 2, 2011

Kaun Farq Aisaa


Kabhi kabhi yaad men ubharate hain naqsh-e-maazii mite mite se
Vo aazamaaish sii dil-o-nazar kii, vo qurabaten sii vo faasale se
Kabhii aarazuu ke seharaa men aake rukate hain qaafile se
Vo saarii baaten lagaav kii sii vo saare unavaan visaal ke se
Nigah-o-dil ko qaraar kaisaa nishaat-o-Gam men kamii kahan kii
Vo jab mile hain to un se har baar kii hai ulfat naye sire se
Bahut giraan hai ye aish-e-tanhaa kahin sabukatar kahin gavaara
Vo dard-e-pinhaan ki saarii duniyaa rafiiq thii jisake vaaste se
Tumhiin kaho rind-o-muhtasib men ho aaj shab kaun farq aisaa
Ye aake baithe hain maikade men vo uthake aaye hain maikade se..

kabhii paabandiyon se chhuut ke bhii


kabhii paabandiyon se chhuut ke bhii dam ghutane lagataa hai
dar-o-diivaar ho jin men vahii zindaan nahiin hotaa

hamaaraa ye tajurbaa ki khush honaa muhabbat men
kabhii mushkil nahiin hotaa, kabhii aasaan nahiin hotaa

bajaa hai zabt bhii lekin muhabbat men kabhii ro le
dabaane ke liye har dard o naadaan nahiin hotaa

yaqiin laayen to kyaa laayen jo shak laayen to kyaa laayen
ki baaton se trii sach-jhuuth kaa imkaan nahiin hotaa